1Th 1 | XSI | STEP | Maka ŋato, Sailas ŋga Timoti ŋga naŋa Paulo warakâŋgu, maka kamo taitu, kala naŋa aŋgere ŋgua ŋine imâ pa miki kalo-tawana tamâta kamo Tesalonaika lawea, miki ŋinde uru kalomi tawana Tamânda Maro Kindeni ŋga Maro Yesu Kirisi. Maro Kindeni ne wisi-wisi wa wisi-pisi wa imâ pami.

1 Thessalonians 1

1 Maka ŋato, Sailas ŋga Timoti ŋga naŋa Paulo warakâŋgu, maka kamo taitu, kala naŋa aŋgere ŋgua ŋine imâ pa miki kalo-tawana tamâta kamo Tesalonaika lawea, miki ŋinde uru kalomi tawana Tamânda Maro Kindeni ŋga Maro Yesu Kirisi. Maro Kindeni ne wisi-wisi wa wisi-pisi wa imâ pami.

Paulo ilo ara ŋana Tesalonaika tamâta nenzi kalo-tawana

2 Ikura zo rârâni maka uru kaloma ŋgere ŋanami, aku maka kaporo ndaŋge ilâ pa Maro Kindeni. Maka uru kano pa i ŋana miki kâ ikura lâ nema noŋa rârâni. 3 Maka kawama ndaŋge pa Tamânda Maro Kindeni, ŋana tu nemi kalo-tawana uru ipaŋo ilomi kalomi ŋana kaveta vetâŋa ara kâ. Aku miki tinimi mwasa panzi tinimi pinde, kala uru kaveta wurâta ara nâ. Aku miki kao tinimi ŋana Maro Yesu Kirisi kâ, kala uru kamandi kaika ku kamo nâ.

4 Nima-nambwe wukale, maka kasama tu Maro Kindeni ilo ndo keno pami, aku ipateami tu ma kapâŋga i ne ŋgu sondo. 5 Maka kasama ŋine ŋana tu muŋga, lâ zo ŋinde maka kakai pâri ara kamâ pami, ande pâri ara ŋinde ŋandai ipâŋga pami itogo tapâriŋa kaa nâ ŋga. Ŋinde ipâŋga tava Koroani Sapâŋa ne walo wa ne mâsi kaika wa, aku miki kamora nema kalo-tawana kaika ŋinde pwataki lâ. Miki warakami nde kasama ŋana maka nema pavilâŋa lâ zo ŋinde maka kamo ŋginimi. 6 Miki kaloŋo Maro Kindeni ne ŋgua lâ, kala miki kapaveta kuku maka nema vetâŋa tava Maro Ŋalae ne vetâŋa. Ŋineŋga malia ŋalae tina ipâŋga pami lâ, andeta Koroani Sapâŋa iveta ilomi ara kala miki kandeka ku kamo kapaipa kuku pâri ara ŋinde. 7 Aku nemi vetâŋa ŋinde itula nzâla ara ndo panzi kalo-tawana tamâta rârâni simo Masedonia tâno wa Akaia tâno wa. 8 Miki katula mâsi ara ŋana koka Maro Ŋalae ne ŋgua muli, aku ŋinde ilâ itogo wâŋgu ne nduŋeŋa mwasina. Andeta nduŋeŋa ŋinde ilâ ipâŋga lâ Masedonia tâno wa Akaia tâno simbonzi nâ, ande tia. Ikura lawea rârâni, ande tamâta siloŋo parinami tu miki kalomi tawana Maro Kindeni. Mine kala maka nema wurâta ŋana katula parinami panzi kâ keno, nde tia. 9 Aku kinzi warakanzi kala uru situla ŋgua ŋana vetâŋa arara ŋinde miki muŋga kaveta, lâ zo ŋinde maka kamo kumi. Kinzi situ parinami tu miki kapu mulimi panzi maro laŋeŋa lâ, aku kapalele ilomi kalomi ilâ pa Maro Kindeni Via Tamwata, ina Maro Mao Kanaŋo, aku kapono muli pa i simbo nâ. 10 Aku situ parinami tu miki uru kao tinimi ŋana zo ŋinde Maro Kindeni Natu ma ipile samba lawea ku itaulo imâ kilo. Inani kala Yesu, muŋga imâte lâ, andeta Maro Kindeni ipaŋo i imo via kilo. Aku i ma ikea ŋana kinda kâ, kala ma tamo ara lâ zo muli ŋinde Maro Kindeni ne wisi-nâna ŋana tamâta nenzi kiesaka kâ ma ipâŋga nia yo.